ບໍ່ດີບ່ອນໃດ ແລະ ເປັນຫຍັງຂ້ອຍຕ້ອງປ່ຽນ? ນີ້ຄືປະໂຫຍກທີ່ເຮົາມັກໄດ້ຍິນເວລາໝູ່ຄູ່ ຫຼື ຄົນອ້ອມຕົວເຮົາມັກມາເວົ້າເລື່ອງບັນຫາທີ່ເຂົາເຫຼົ່ານັ້ນພົບພໍ້ໃນຊີວິດໃຫ້ເຮົາຟັງ.
ເພາະພວກເຂົາຄິດວ່າສິ່ງທີ່ເຄີຍເຮັດມາມັນກໍ່ດີຢູ່ແລ້ວ ແລະ ບໍ່ຈຳເປັນຕ້ອງປ່ຽນແປງຫຍັງ, ເຊິ່ງມັນກໍມີທັງຖືກ ແລະ ບໍ່ຖືກຕ້ອງໄປໝົດທຸກຢ່າງ, ມັນກໍຂຶ້ນກັບເຫດການບາງກໍລະນີທີ່ເຮົາຕ້ອງຊັ່ງຊາກັນດ້ວຍເຫດຜົນໃຫ້ຫຼາຍພໍສົມຄວນ.
ແຕ່ຖ້າເຮົາລອງຄິດໃນມຸມມອງທີ່ກວ້າງໆຄິດເຖິງສາເຫດ, ວິທີແກ້ໄຂຕ່າງໆ ແລະ ຄິດວ່າທີ່ເຂົາເວົ້າມາມັນກໍຖືກໃດ໋ເນາະເລີຍຢາກປ່ຽນມຸມມອງໃໝ່ຢາກໃຫ້ມັນດີຂຶ້ນ, ແລ້ວການຢາກເປັນຄົນທີ່ດີຂຶ້ນເຮົາຕ້ອງເຮັດຫຍັງກ່ອນ? ຕ້ອງເລີ່ມແນວໃດ? ຍິ່ງຄິດກໍ່ບໍ່ເຂົ້າໃຈເພາະເກີດຄຳຖາມແບບນີ້ວົນໃນຫົວຊໍ້າໄປຊໍ້າມາ, ເພາະມັນມີຫຼາຍອົງປະກອບຫຼາຍຢ່າງອີ່ຫຼີ່ ແລະ ມື້ນີ້ມ່ວນເລີຍຢາກຈະຊວນທຸກຄົນມາຫາຄຳຕອບນຳກັນ.
ກ່ອນອື່ນເລີຍການທີ່ເຮົາຢາກສ້າງ ຫຼື ພັດທະນາສິ່ງຕ່າງໆ, ເຮົາຕ້ອງເລີ່ມຈາກຕົນເອງ ແລະ ຄວາມຕັ້ງໃຈຂອງເຮົາ. ຕ້ອງໄດ້ໃຊ້ຄວາມອົດທົນພະຍາຍາມຢ່າງສະໝໍ່າສະເໝີ, ມີເປົ້າໝາຍ ແລະ ມີລະບຽບວິໄນກັບຕົນເອງ.
1. ສຶກສາ ແລະ ຮູ້ຈັກຕົນເອງ:
ເປັນສິ່ງທຳອິດທີ່ສຳຄັນ ແລະ ທຸກຄົນຕ້ອງໃສ່ໃຈ, ເພາະເຮົາຈະຕ້ອງໄດ້ຮູ້ເຖິງຂໍ້ດີ – ຂໍ້ເສຍຂອງຕົນເອງ ແລະ ຍອມຮັບເພື່ອຮຽນຮູ້ແລ້ວນໍາມາປັບປຸງຕົນເອງ.
2. ເຝິກຝົນໃຫ້ມີຄວາມເຫັນອົກເຫັນໃຈຜູ້ອື່ນ:
ການທີ່ເຮົາມີຄວາມເຫັນໃຈຜູ້ອື່ນແມ່ນເປັນສິ່ງທີ່ດີ ເພາະຖ້າວ່າເຮົາຕົກຢູ່ໃນສະຖານະການດຽວກັນກັບເຂົາເຈົ້າ ເຮົາຈະຮູ້ສຶກແບບໃດ ການເຂົ້າໃຈຄວາມຮູ້ສຶກຜູ້ອື່ນຈະຊ່ວຍໃຫ້ເຮົາໃຊ້ຄວາມຄິດ ແລະ ຈຶ່ງສະແດງອອກມາໄດ້ຢ່າງເໝາະສົມໃຫ້ເຂົ້າກັບສະຖານະການ.
3. ຮັບຜິດຊອບຕໍ່ການກະທຳຕົນເອງ:
ຮຽນຮູ້ທີ່ຈະຍອມຮັບຜິດ ແລະ ຂໍໂທດ, ນີ້ແມ່ນການສະແດງເຖິງຄວາມຮັບຜິດຊອບຕໍ່ການກະທຳຂອງຕົນເອງໂດຍການບໍ່ໂຍນຄວາມຜິດໃຫ້ໃຫ້ຜູ້ອື່ນ ເຊິ່ງມັນຈະຊ່ວຍເຮັດໃຫ້ເຮົາມີຄວາມໜ້າເຊື່ອຖື ແລະ ເປັນທີ່ເຄົາລົບນັບຖື.
4. ຕັ້ງເປົ້າໝາຍ:
ການຕັ້ງເປົ້າໝາຍໃຫ້ຊັດເຈນ ແລະ ມຸ່ງໝັ້ນທີ່ຈະເຮັດໃຫ້ສຳເລັດຈະຊ່ວຍໃຫ້ເຮົາມີແຮງຈູງໃຈໃນການພັດທະນາຕົນເອງ, ໃຫ້ລອງແບ່ງເປົ້າໝາຍໃຫຍ່ອອກເປັນສ່ວນໆເພື່ອສາມາດຕິດຕາມຄວາມກ້າວໜ້າໄດ້ງ່າຍຂຶ້ນ.
5. ພັດທະນາທັກສະການສື່ສານ:
ການພັດທະນາການສື່ສານເປັນສິ່ງທີ່ສຳຄັນໃນການສ້າງຄວາມສຳພັນທີ່ດີ ເຝິກຝົນການຟັງຢ່າງຕັ້ງໃຈ ການສະແດງຄວາມຮູ້ສຶກຢ່າງໃຫ້ກຽດເຊີ່ງກັນ ແລະ ກັນ, ໂອ້ລົມກັນຢ່າງກົງໄປກົງມາດ້ວຍຄວາມອ່ອນໂຍນຈິງໃຈ.
6. ເຝິກຝົນການໃຫ້ອະໄພ:
ຮຽນຮູ້ທີ່ຈະໃຫ້ອະໄພທັງຕົນເອງ ແລະ ຄົນອື່ນ, ເຊິ່ງເປັນການສະແດງອອກເຖິງຄວາມເມດຕາ. ການເກັບຄວາມໃຈຮ້ອນ ຫຼື ໃຈຮ້າຍໄວ້ຈະເຮັດໃຫ້ເຮົາໜັກໃຈ ແລະ ບໍ່ສາມາດກ້າວໄປທາງໜ້າໄດ້ຢ່າງເຕັມທີ່.
7. ໃຊ້ເວລາໃຫ້ເປັນປະໂຫຍດ:
ການບໍລິຫານເວລາໃຫ້ດີຈະຊ່ວຍໃຫ້ເຮົາມີເວລາໃນການເຮັດສິ່ງທີ່ສຳຄັນກ່ອນ, ການຈັດລະດັບຄວາມສຳຄັນ ແລະ ຫຼີກຫຼ່ຽງການເຮັດສິ່ງທີ່ບໍ່ຈຳເປັນຈະເຮັດໃຫ້ຊີວິດມີລະບຽບຂຶ້ນ.
8. ດູແລສຸຂະພາບທັງກາຍ ແລະ ໃຈ:
ການດູແລຕົນເອງທັງກາຍ ແລະ ໃຈຄືສິ່ງທີ່ສຳຄັນທີ່ສຸດ. ເລີ່ມຕົ້ນດ້ວຍການອອກກໍາລັງກາຍ, ກິນອາຫານທີ່ມີປະໂຫຍດ ແລະ ພັກຜ່ອນໃຫ້ພຽງພໍຈະເຮັດໃຫ້ເຮົາມີສຸຂະພາບທີ່ດີ ແລະ ພ້ອມທີ່ຈະພົບກັບຄວາມທ້າທາຍຕ່າງໆ.
9. ຮຽນຮູ້ ແລະ ປັບປຸງຕົວເອງຢູ່ສະເໝີ:
ການຮຽນຮູ້ຈາກປະສົບການທັງດີ ແລະ ບໍ່ດີ ຈະເຮັດໃຫ້ເຮົາໃຫຍ່ຂຶ້ນ, ການເປີດໃຈຮັບຟັງຄຳແນະນຳ ແລະ ການວິຈານຈະຊ່ວຍໃຫ້ເຮົາມີມຸມມອງທີ່ກວ້າງຂຶ້ນ ແລະ ສາມາດປັບປຸງຕົນເອງໄດ້.
ການເປັນຄົນທີ່ດີຂຶ້ນບໍ່ໄດ້ໝາຍຄວາມວ່າເຮົາຈະຕ້ອງປ່ຽນແປງຕົນເອງທັນທີ ແຕ່ຄືການພະຍາຍາມປັບປຸງຕົວເອງຢ່າງສະໝ່ຳາສະເໝີ ແລະ ບໍ່ຢຸດທີ່ຈະພັດທະນາ, ປ່ຽນແປງໄປເທື່ອລະໜ້ອຍໃນທຸກມື້ຈະເຮັດໃຫ້ເຮົາເປັນຄົນທີ່ດີຂຶ້ນ ແລະ ມີຊີວິດທີ່ມີຄວາມສຸກຫຼາຍຂຶ້ນໃນໄລຍະຍາວ.
ໂດຍ: ທີມບັນນາທິການ Muan
