ຢາກມີແຟນ ແຕ່ກະຂີ້ຄ້ານຕອບແຊັດ ແລ້ວຕອນໃດຈະມີແຟນຈັກເທື່ອ?
ຫຼາຍຄົນເປັນບໍ່? ຈົ່ມຢູ່ຫັ້ນລະວ່າຢາກມີແຟນ ຢາກມີແຟນ ຢາກເຈິຄົນທີ່ແມ່ນແລ້ວ ແຕ່ພໍຮອດຕອນທີ່ຕ້ອງໄດ້ລົມກັບໃຜບາງຄົນ ແລ້ວຕ້ອງໄດ້ຈອບແຊັດ ຊໍ້າພັດຂີ້ຄ້ານຕອບຊ້ຳ. ແລ້ວຍ້ອນຫຍັງຈຶ່ງເປັນແບບນັ້ນລະ? ມາເບິ່ງກັນວ່າ ບັນຫານີ້ເກີດຂຶ້ນຈາກຫຍັງ ແລະ ຖ້າເຈົ້າຢາກມີຄວາມສຳພັນທີ່ຈິງຈັງ ຈະປັບຕົວແນວໃດດີ.
ໃນມຸມຂອງຜູ້ທີ່ຄ້ານຕອບແຊັດນັ້ນ, ການຕອບແຊັດບາງຄັ້ງເຮັດໃຫ້ພວກເຂົາຮູ້ສຶກວ່າເປັນຄືກັບພາລະກິດອັນຍິ່ງໃຫຍ່ ຄືກັບການເຮັດວຽກອັນໜຶ່ງ. ຍິ່ງແຊັດມາຫຼາຍ ຍິ່ງຮູ້ສຶກວ່າຕ້ອງໃຊ້ພະລັງງານສູງໃນການພິມຕອບ. ເຖິງວ່າໃນໃຈຢາກມີແຟນ ແຕ່ການທີ່ຕ້ອງໄດ້ຕອບກັບ ອາດຈະເຮັດໃຫ້ເມື່ອຍໄດ້ງ່າຍໆ ໂດຍສະເພາະໃນຍຸກທີ່ທຸກຢ່າງໄວໄປໝົດ ແລະ ເຮົາກໍພຽງແຕ່ຕ້ອງການພັກສະໝອງ.
ນອກຈາກນັ້ນ ກໍອາດເປັນຍ້ອນເຈົ້າໂຕຂີ້ຄ້ານແບບບໍ່ໄດ້ຕັ້ງໃຈ ກ່າວຄື ບາງເທື່ອມັນກໍເປັນສັນຍານບົ່ງບອກວ່າ ເຮົາອາດຈະຍັງບໍ່ພ້ອມທີ່ຈະເປີດໃຈໃຫ້ກັບໃຜໃນຕອນນັ້ນ. ເຈົ້າອາດຈະຢາກມີແຟນແຫຼະ ແຕ່ເລິກໆແລ້ວ ກໍຍັງບໍ່ຢາກສະຫຼະເວລາທີ່ຕ້ອງໃຊ້ກັບໂຕເອງໃຫ້ກັບຄົນອື່ນ.
ສຸດທ້າຍແມ່ນ ເຮົາຍັງຢ້ານການຜູກພັນ. ບາງຄົນຮູ້ສຶກວ່າ ການຕອບແຊັດເລື້ອຍໆນັ້ນ ມັນຈະເຮັດໃຫ້ເຮົາຕ້ອງພັດທະນາຄວາມສຳພັນໄປອີກຂັ້ນ ແລະ ນັ້ນອາດຈະເຮັດໃຫ້ຮູ້ສຶກກົດດັນໂດຍບໍ່ຮູ້ໂຕ ກໍເລີຍເລືອກບໍ່ຕອບດີກວ່າ.
ທາງອອກຂອງບາງຄົນຕໍ່ກັບບັນຫານີ້ກໍຄືຈະໜີບໍ່ພົ້ນການອອກໄປເຈິໜ້າກັນ ລົມກັນແບບໂຕຕໍ່ໂຕ ແຕ່ເນື່ອງຈາກປັດໄຈດ້ານເວລາ ແລະ ບາງຄັ້ງອາດລວມເຖິງໄລຍະຫ່າງ, ສຸດທ້າຍແລ້ວ ກໍກັບມາທີ່ການແຊັດກັນທາງອອນລາຍຄືເກົ່າ. ແລ້ວຈະເຮັດແນວໃດ ໃຫ້ໂຕເອງຕອບແຊັດໄດ້ດີຂຶ້ນ?
1. ກ້າວຂ້າມຄວາມກັງວົນ : ບາງເທື່ອເຮົາຢ້ານວ່າການຕອບແຊັດໄປແລ້ວເຮັດໃຫ້ອີກຝ່າຍເຂົ້າໃຈຜິດ ອາດຈະເຮັດໃຫ້ເຮົາຢ້ານການຕອບແຊັດ. ເຮົາອາດລອງຖອຍອອກມາໜຶ່ງກ້າວ ກັງວົນກັບຕົວເອງໜ້ອຍລົງ ກັງວົນກ່ຽວກັບຕົວອັກສອນໃຫ້ໜ້ອຍລົງ ຢ່າຟ້າວຄາດເດົາໃນສິ່ງທີ່ຍັງບໍ່ທັນເກີດຂຶ້ນ.
2. ເອົາໃຈເຂົາມາໃສ່ໃຈໂຕເອງ: ພະຍາຍາມທຳຄວາມເຂົ້າໃຈທຳມະຊາດໃນຕົວຕົນ ແລະ ອາລົມຂອງຄູ່ສົນທະນາຜ່ານໂຕອັກສອນ. ຖ້າເຮົາເປັນລາວໃນສະຖານະການແບບນີ້ ເຮົາຈະຕໍ່ບົດສົນທະນາແນວໃດ.
3. ຈັດສັນເວລາ: ຖ້າຢ້ານວ່າຈະພັດທະນາຄວາມສຳພັນບໍ່ໄດ້ ຍ້ອນນິໄສບໍ່ມັກຕອບແຊັດຂອງໂຕເອງ ກໍລອງວາງເວລາ ແລະ ເບິ່ງໃຫ້ເປັນ ສິ່ງທີ່ຕ້ອງເຮັດ ໃນແຕ່ລະມື້ ຄືກັບການອາບນໍ້າ, ກິນເຂົ້າ ແລະ ເຮັດໃນລະດັບທີ່ພໍເໝາະ ເພື່ອບໍ່ໃຫ້ຝືນໃຈຕົວເອງ ແຕ່ເປັນການຕົກລົງກັບອີກຝ່າຍວ່າຈະເຂົ້າມາຕອບແຊັດໃນຊ່ວງໃດຂອງມື້ແດ່.
4. ລົມກັບຄົນທີ່ແມ່ນ ແລະ ເຂົ້າໃຈ: ເຊື່ອເທາະວ່າ ຖ້າເຈົ້າເຈິຄົນທີ່ແມ່ນ ແລະ ຖືກໃຈແທ້ໆ ເຈົ້າຈະຍອມແຫກກົດຄວາມເປັນໂຕເອງອອກມາ, ກ້າປະເຊີນໜ້າ ແລະ ລອງເຮັດໃນສິ່ງທີ່ບໍ່ເຄີຍມັກໄດ້ຢ່າງບໍ່ຝືນໃຈ ເພື່ອລາວຄົນນັ້ນ ແລະ ຖ້າມື້ໜຶ່ງເຮົາເຈິກັບຄົນທີ່ຮູ້ທຳມະຊາດຂອງການສົນທະນາ, ມີອາລົມຕະຫຼົກແບບດຽວກັນ ນັ້ນອາດຈະເຮັດໃຫ້ບົດສົນທະນາລ່ຽນໄຫຼ ຈົນເຮົາຕອບແຊັດໄດ້ຫຼາຍຂຶ້ນຈາກເກົ່າຢ່າງແນ່ນອນ.
ສຸດທ້າຍແລ້ວ ໃດໆກໍຄືການຍອມເປີດໃຈ ແລະ ກ້າວຂ້າມຄວາມກັງວົນບາງຢ່າງ ເພື່ອຈະໄດ້ເຈິກັບບາງຢ່າງເຊັ່ນກັນ. ບໍ່ຕອບແຊັດ ແຕ່ໄດ້ໃຊ້ເວລາກັບໂຕເອງ ແລະ ສະບາຍໃຈ ຫຼື ຈະຕອບແຊັດ ແຕ່ໄດ້ສະຫຼະເວລາບາງສ່ວນເພື່ອຄວາມສຳພັນ. ຢາກໄດ້ແບບໃດກໍລອງເລືອກເອົາ.
ໂດຍ: ທີມບັນນາທິການ Muan
