ເຄີຍບໍ່? ເວລາອົກຫັກແລ້ວໄປຫາຕັດຜົມ? ແລ້ວເປັນຫຍັງເວລາຜູ້ຍິງອົກຫັກແລ້ວຕ້ອງຕັດຜົມ ?
ເຈົ້າເຄີຍບໍ່ເວລາອົກຫັກແລ້ວມັກຕັດຜົມ… ເຮົາມັກເຄີຍໄດ້ຍິນ ຫຼື ເຫັນການກະທຳເວລາຜູ້ຍິງອົກຫັກແລ້ວມັກໄປຕັດຜົມ, ແລ້ວເປັນຫຍັງຈຶ່ງຕ້ອງຕັດຜົມລະ ມີໃຜເຄີຍສົງໄສບໍ? ມື້ນີ້ເຮົາມີຄຳຕອບ ແລະ ຄຳອະທິບາຍໃຫ້ທຸກຄົນໄດ້ມາຮູ້ພ້ອມໆກັນ.
ສຳລັບຄຳອະທິບາຍນັ້ນເຄີຍມີນັກຈິດຕະວິທະຍາໄດ້ເຄີຍພາຍາຍາມຫາຄຳຕອບສໍາລັບຄຳຖາມທີ່ວ່າເປັນເວລາອົກຫັກຜູ້ຍິງມັກຕັດຜົມ?
ຄົນທຳອິດຄື Lisa Conception ຜູ້ໃຫ້ຄຳປຶກສາກ່ຽວກັບການອອກເດດ ແລະ ການສ້າງຄວາມສຳພັນ, ລາວໄດ້ໃຫ້ຄຳຕອບໄວ້ວ່າ: “ເຫດຜົນໜຶ່ງຄືການທີ່ເຮົາຕ້ອງການຈຳກັດຄົນທີ່ເຮົາເຄີຍເປັນ ຕອນທີ່ໄດ້ໃຊ້ເວລາຮ່ວມກັບອີກຄົນໃຫ້ໝົດໄປ ການຍ້ອມສີຜົມ ຫຼື ຕັດຜົມແມ່ນເປັນວິທີໜຶ່ງທີ່ເຮັດໄດ້ຢ່າງໄວວາ”.
ຜູ້ໃຫ້ຄຳປຶກສາທາງດ້ານຈິດທະວິທະຍາ ແລະ ນັກບໍາບັດການແຕ່ງດອງຢ່າງ ດຣ. ເຊີຣີ ໄດ້ໃຫ້ເຫດຜົນໄວ້ວ່າ ການຕັດຜົມນັ້ນຄ້າຍຄືກັບການຕັດພະລັງງານທີ່ບໍ່ດີອອກໄປ ມັນຄືການໄດ້ໃສ່ຊຸດໃໝ່ຫຼັງຈາກວັນທີ່ບໍ່ດີ ເຈົ້າຈະຮູ້ສຶກວ່າເປັນຄົນໃໝ່ ບໍ່ແມ່ນຄົນທີ່ຖືກຖິ້ມ ຫຼື ອົກຫັກ ແລະ ພ້ອມທີ່ຈະເລີ່ມຕົ້ນໃໝ່ອີກຄັ້ງ.
ນອກຈາກນີ້ຍັງມີຜູ້ຊ່ຽວຊານອີກທ່ານໜຶ່ງໄດ້ໃຫ້ຄວາມເຫັນວ່າ ການຕັດຜົມນີ້ສົ່ງຜົນຕໍ່ການປ່ຽນແປງທາງຈິດ, ມັນຄືການທີ່ເຮົາໄດ້ຕັດສິ່ງບໍ່ດີອອກໄປ ປັບລຸກໃໝ່ເບິ່ງແຍງຜົມທີ່ປົ່ງຂຶ້ນມາໃໝ່ຢ່າງສວຍງາມ ແລະ ມີຄຸນນະພາບດີກວ່າເກົ່ານັ້ນເອງ.
ຈາກເວັບ yourtango ນັ້ນໄດ້ໃຫ້ເຫດຜົນຫຼາກຫຼາຍຂໍ້ອີກວ່າ: “ການຕັດຜົມເຮັດໃຫ້ເຮົາໄດ້ລົມກັບຄົນອື່ນບໍ່ວ່າຈະເປັນຊ່າງຕັດຜົມ, ໝູ່ ຫຼື ຄົນອ້ອມຂ້າງ. ການທີ່ເຮົາລົມກັບຄົນອື່ນນັ້ນກໍເຮັດໃຫ້ເຮົາເບົາໃຈລົງໄດ້ ແລະ ລືມຄວາມເສຍໃຈໄປຊົ່ວຂະນະ”.
ການຕັດຜົມເຮັດໃຫ້ເຮົາຮູ້ສຶກອິດສະຫຼະ. ອິດສະຫຼະໃນບ່ອນນີ້ຄືການທີ່ເຮົາໄດ້ໃຊ້ເວລາບໍ່ດົນໃນການສະຜົມ, ການແຕ່ງໂຕເຮົາຮູ້ສຶກເຮັດໃຫ້ເຮົາມີເວລາດົນໃນການເຮັດສິ່ງຕ່າງໆໄດ້ຫຼາຍຂຶ້ນ.
ການຕັດຜົມຊ່ວຍໃຫ້ເຮົາບໍ່ນຶກເຖິງເຫດການເກົ່າທີ່ເກີດຂຶ້ນ ຫຼື ຄວາມສໍາພັນທີ່ຫາກໍຈົບໄປ, ບາງເທື່ອອາດຈະເຄີຍມີກິດຈະກຳຮ່ວມກັນເຊັ່ນ: ແຟນເຄີຍເປຍຜົມໃຫ້, ຫວີຜົມໃຫ້ ຫຼື ຊື້ເຄື່ອງປະດັບມາຕິດຜົມໃຫ້ ເຊິ່ງການຕັດຜົມຈະສາມາດຊ່ວຍໃຫ້ເຮົາບໍ່ຄິດເຖິງເຫດການເຫຼົ່ານັ້ນອີກ.
ສະຫຼຸບ ເປັນຫຍັງຜູ້ຍິງເວລາອົກຫັກຕ້ອງຕັດຜົມ? ເຫດຜົນຫຼັກໆຄື: ຕ້ອງການມີຄວາມຮູ້ສຶກເປັນຄົນໃໝ່, ບອກລາເລື່ອງລາວເກົ່າໆໃນຄວາມສໍາພັນທີ່ຫາກໍຈົບໄປ, ຮັກໂຕເອງໃຫ້ຫຼາຍຂຶ້ນ ແລະ ຖິ້ມເລື່ອງລາວທີ່ບໍ່ດີທັງໝົດໄປພ້ອມໆກັບຜົມທີ່ຖືກຕັດໄປ.
