ບາງຄູ່ຮັກທີ່ຄົບກັນດົນໆ ເມື່ອເວລາຜ່ານໄປ ອາດຈະເຮັດໃຫ້ມີການເສີຍຊາຕໍ່ກັນຫຼາຍຂຶ້ນ ຫຼື ຮູ້ຈັກກັນຫຼາຍເກີນໄປຈົນເຮັດໃຫ້ຄວາມສຳພັນຂອງຊີວິດຄູ່ບໍ່ມີຄວາມຕື່ນເຕັ້ນຄືແຕ່ກ່ອນແລ້ວ.
ເມື່ອຄວາມຮັກທີ່ເຄີຍຫວານແຫວວ ກາຍເປັນຄວາມໜ້າເບື່ອ… ເອີ້ນວ່າ “ ຄວາມຮັກເຖິງຈຸດອິ່ມຕົວ ”
ມື້ນີ້ເຮົາມາອ່ານ 4 ສັນຍານເຕືອນວ່າຄວາມຮັກເຮົານັ້ນມາຮອດຈຸດອິ່ມຕົວແລ້ວ ຫຼື ຍັງ? ມາເບິ່ງນຳກັນ ເພື່ອທີ່ຈະແກ້ໄຂກ່ອນຊ້າເກີນໄປ.
1. ຄວາມຮູ້ສຶກທີ່ມີຕໍ່ກັນບໍ່ຄືເກົ່າ
ແມ່ນຢູ່ວ່າເມື່ອຄົນທີ່ຄົບກັນມາດົນຄວາມຕື່ນເຕັ້ນກໍຫຼຸດລົງ ແຕ່ກໍບໍ່ແມ່ນວ່າຈະບໍ່ມີເລີຍ. ຍັງຈື່ຄວາມຮູ້ສຶກຕອນທີ່ຕອນທີ່ຈີບກັນໃໝ່ໆໄດ້ບໍ່? ລອງເອົາຄວາມຮູ້ສຶກຕອນນັ້ນມາທຽບກັບຕອນນີ້ເບິ່ງ, ຖ້າເຮົາເຫັນຄວາມແຕກຕ່າງຊັດເຈນກໍແມ່ນແລ້ວແຫຼະ.. ເມື່ອຄວາມຮູ້ສຶກບໍ່ຄືເກົ່າ ຄວາມສຳຄັນທີ່ເຄີຍໄດ້ຮັບກໍບໍ່ມີຄືເກົ່າແລ້ວ, ຈາກທີ່ທີ່ເຄີຍໂຫຍຫາ ຢາກເຈິໜ້າກັນທຸກມື້ ກາຍເປັນວ່າຢາກຢູ່ຄົນດຽວ ຫຼື ຢູ່ກັບຄົນອື່ນຫຼາຍກວ່າ.
2. ມີຄວາມສຸກກັບຢ່າງອື່ນຫຼາຍກວ່າ
ເມື່ອຄວາມສຳຄັນນັ້ນຖືກຫຼຸດຄ່າລົງ ກໍຈະມີຢ່າງອື່ນທີ່ເຂົ້າມາແທນ ອາດຈະເປັນວຽກງານ, ໝູ່ເພື່ອນ, ຄອບຄົວ ຫຼື ຕົນເອງ. ກາຍເປັນວ່າເຮົາໃຫ້ຄວາມສຳຄັນກັບສິ່ງເຫຼົ່ານັ້ນຫຼາຍກວ່າຄົນຮັກ ທີ່ແຕ່ກ່ອນເກືອບຈະຫ່າງກັນບໍ່ໄດ້, ບໍ່ເຈິໜ້າກໍບໍ່ຄິດຮອດ, ມິດໄປກໍບໍ່ໄດ້ຄິດຫາ, ບໍ່ມີຄວາມຮູ້ສຶກໂຫຍຫາ ຫຼື ສົນໃຈຄືແຕ່ກ່ອນ, ເພາະຮູ້ສຶກວ່າການຢູ່ຄົນດຽວ ແລະ ເຮັດຢ່າງອື່ນມີຄວາມສຸກກວ່າ.
3. ຜິດກັນຕະຫຼອດ
ການມີເລື່ອງບໍ່ເຂົ້າໃຈກັນບາງຄັ້ງຄາວເປັນເລື່ອງປົກກະຕິຂອງຄູ່ຮັກຢູ່ແລ້ວ, ແຕ່ການທີ່ຜິດກັນຕະຫຼອດໃນບັນຫາເກົ່າໆທີ່ບໍ່ສາມາດແກ້ໄຂໄດ້ຈັກເທື່ອ ເປັນເລື່ອງທີ່ຄວນແກ້ໄຂ. ເວລາທີ່ມີຫຍັງບໍ່ພໍໃຈກັນ ບໍ່ວ່າຈະເປັນເລື່ອງເລັກນ້ອຍຊ່ຳໃດ ກໍພ້ອມທີ່ຈະລະເບີດອາລົມ ເວົ້າຈາທຳຮ້າຍກັນ ຫຼື ເຮັດໃຫ້ເປັນເລື່ອງໃຫຍ່ໄດ້. ໂດຍສະເພາະເມື່ອຄວາມສຳພັນມາເຖິງຈຸດທີ່ສັບສົນ ເຮັດໃຫ້ມີການຜິດຖຽງກັນຕະຫຼອດ ແລະ ບໍ່ຢາກທີ່ຈະປັບຄວາມເຂົ້າໃຈກັນ.
4. ບໍ່ຄ່ອຍໄດ້ລົມກັນ
ເມື່ອຢູ່ໃນຄວາມສຳພັນບໍ່ວ່າຈະຮູບແບບໃດກໍຕາມ ການສື່ສານເປັນສິ່ງທີ່ສຳຄັນ. ໂດຍສະເພາະກັບຄູ່ຮັກ, ຕອນຮັກກັນ ກໍຢາກລົມນຳຕະຫຼອດເວລາ ຢາກແຊັດ ຢາກໂທຫາ ລົມກັນຈົນຮອດເດິກ ແຕ່ຫຼັງໆມາ ຈາກທີ່ເຄີຍລົມກັນໝົດມື້ໝົດຄືນກໍເລີ່ມໜ້ອຍລົງ ບາງຄູ່ເວລາຄຽດກັນ ກໍມິດໃສ່ກັນໄປເລີຍ, ບໍ່ມີໃຜຢາກປັບຄວາມເຂົ້າໃຈຈົນເຮັດໃຫ້ຫ່າງເຫີນກັນໄປເພາະຕ່າງຝ່າຍຕ່າງເມື່ອຍ ຫຼື ລຳຄານກັນຈົນປ່ອຍປະລະເລີຍຄວາມສຳຄັນໃນຈຸດນີ້ໄປ.
ຄວາມຮັກທີ່ມາເຖິງຈຸດອິ່ມຕົວໃນມື້ໃດມື້ໜຶ່ງເປັນເລື່ອງປົກກະຕິຫຼາຍໃນຄວາມສຳພັນ ແຕ່ເມື່ອມາຮອດຈຸດນັ້ນແລ້ວ ກໍແມ່ນຂຶ້ນກັບທັງສອງຄົນວ່າຈະພ້ອມປັບຄວາມເຂົ້າໃຈກັນເພື່ອປະຄັບປະຄອງໃຫ້ຄວາມຮັກນີ້ໄດ້ໄປຕໍ່ ແລະ ບາງຄັ້ງຈຸດອິ່ມຕົວກໍອາດຈະເປັນອັນພິສູດວ່າ ຮັກທີ່ມີໃຫ້ກັນ ເປັນຮັກແທ້ ຫຼື ເປັນພຽງແຕ່ຄວາມຫຼົງຊົ່ວຄາວ.
ໂດຍ: ທີມບັນນາທິການ Muan
