ເມື່ອໝູ່ຊວນໄປກິນເຂົ້າຮ້ານອາຫານຫຼູ ຫຼື ລາຄາແພງແລ້ວເຮົາມີປັນຫາເລື່ອງເງິນແຕ່ບໍ່ຮູ້ຊິບອກແນວໃດ ຈະປະຕິເສດແນວໃດດີ? ຫຼື ຊວນກັນຈັດທຣິບໄປທ່ຽວແລ້ວມີໝູ່ບອກວ່າເງິນບໍ່ພ້ອມໄປກັນເລີຍ ເຮັດໃຫ້ໝູ່ໄປບໍ່ຄົບກັນ ກໍຈະມີຄວາມຮູ້ສຶກຜິດ ແລະ ເສຍດາຍໄປອີກ. ຖ້າເບິ່ງອີກມຸມໜຶ່ງເງິນບໍ່ໄດ້ມີສ່ວນກ່ຽວຂ້ອງຫຍັງກັບຄວາມສຳພັນຂະໜາດນັ້ນ ແຕ່ມັນກໍເປັນປັດໃຈໜຶ່ງທີ່ເຮົາຕ້ອງມີ ແລະ ຕ້ອງໃຊ້ ແຕ່ກໍບໍ່ໄດ້ໝາຍຄວາມວ່າຈະພ້ອມໃຊ້ຕະຫຼອດເວລາ.
ຖ້າປະຕິເສດໄປເລີຍກໍຢ້ານໝູ່ເວົ້າໃຫ້ ຫຼື ເວົ້າໃສ່ ແລະ ອາດຈະມີການນ້ອຍໃຈ ຫຼື ຄຽດໄປເລີຍກະມີ, ຍ້ອນເຫດຜົນທີ່ວ່າໄດ້ນັດກັນໄວ້ແລ້ວ ເວົ້າກັນຕົກລົງກັນດີແລ້ວ ແລ້ວເປັນຫຍັງບໍ່ໄປ ມີວຽກດ່ວນຫຍັງກະດຽວວ່ານັດກັນກ່ອນໜ້ານີ້ ແລະ ເຫດຜົນອື່ນໆອີກຫຼາຍອັນ. ເອົາຕາມຄວາມເປັນຈິງແລ້ວເລື່ອງເງິນຄືເລື່ອງໃຫຍ່ເພາະທຸກຢ່າງຕ້ອງໃຊ້ເງິນຊື້ ແລະ ທຸກຢ່າງຕ້ອງໃຊ້ເງິນຈ່າຍ, ເຊິ່ງຖ້າຕອນນັ້ນໝູ່ນັດກັນໄປກິນເຂົ້າ ຫຼື ບ່ອນອື່ນແລ້ວເງິນເຮົາບໍ່ທັນອີ່ຫຼີກໍໄປນຳບໍ່ໄດ້ ກໍຈຳເປັນຕ້ອງປະຕິເສດ ຫຼື ເລື່ອນໄປ ແຕ່ຖ້າບອກຕາມຄວາມຈິງແລ້ວໝູ່ຈະເຂົ້າໃຈເຮົາບໍ? ນັ້ນກໍອີກເລື່ອງໜຶ່ງ.
ຖ້າເຮົາເລີ່ມມີຄວາມຮູ້ສຶກວ່າຢາກຈະປຶກສາ ຫຼື ເວົ້າກ່ຽວກັບກ່ຽວກັບເລື່ອງການເງິນນໍາໝູ່ແລ້ວ ຫຼື ຮູ້ສຶກໄດ້ວ່າໝູ່ມີປັນຫາທາງເລື່ອງນີ້ຢູ່ແຕ່ບໍ່ກ້າຖາມຕົງໆ Kathleen Burns Kingsbury ຜູ້ຊ່ຽວຊານດ້ານຈິດຕະວິທະຍາ ໄດ້ບອກວ່າການເວົ້າເຖິງເລື່ອງເງິນຂຶ້ນມາດື້ໆ ແບບເວົ້າຂຶ້ນມາເລືຍ ຫຼື ເຂົ້າປະເດັນໄປເລີຍອາດຈະເຮັດໃຫ້ອີກຝ່າຍຮູ້ສຶກອຶດອັດເພາະບໍ່ທັນໄດ້ຕັ້ງຕົວ ດັ່ງນັ້ນເຮົາອາດຈະຫາຈັງຫວະທີ່ເໝາະສົມ ຫຼື ເລີ່ມເວົ້າເຖິງບົດຄວາມ, ຂ່າວ ຫຼື ຄອນເທັນທີ່ໃກ້ຄຽງເພື່ອແລກປ່ຽນຄວາມຄິດເຫັນກັນ ແລ້ວຫາຈັງຫວະແຊຣເລື່ອງຂອງເຮົາ ຫຼື ຖາມໝູ່ລະຫວ່າງລົມເລື່ອງນີ້ແທນ ແຕ່ເຖິງຢ່າງໃດກໍຕາມ ບົດສົນທະນາທີ່ເກີດຂຶ້ນກໍຄວນເປັນການສື່ສານທັງສອງທາງ ຖ້າຝ່າຍໃດຝ່າຍໜຶ່ງບໍ່ຢາກເລົ່າ ຫຼື ບໍ່ເຕັມໃຈທີ່ຈະເລົ່າກໍມີສິດບອກວ່າບໍ່ສະບາຍໃຈທີ່ຈະລົມເລື່ອງນີ້ເຊັ່ນກັນ.
ເລື່ອງນີ້ຖ້າຈະໃຫ້ເວົ້າມັນກໍຄົງຈະແມ່ນການເອົາໃຈແລກໃຈ ກໍຄືການທີ່ເອົາໃຈເຂົາມາໃສ່ໃຈເຮົາຕ້ອງມີຄວາມເຂົ້າໃຈກັນສຸດໆ ເພາະບາງເທື່ອແມ່ນຢູ່ວ່າມີການນັດໝາຍ ຫຼື ຈັດແຜນກັນເອົາໄວ້ແລ້ວ ແຕ່ຖ້າຄ່າໃຊ້ຈ່າຍມັນເກີນກຳນົດ ຫຼື ຫຼາຍກວ່າທີ່ລົມກັນໄວ້ ມັນກໍຢາກທີ່ເຮົາຈະສາມາດຈ່າຍ ຫຼື ອາດຈະມີປັນຫາທີ່ຕ້ອງໃຊ້ເງິນຕອນນັ້ນດ່ວນມາກໍມີື ເຊິ່ງຍາກແຮງທີ່ຈະບອກປັນຫາເພາະບໍ່ໄດ້ໝາຍຄວາມວ່າໝູ່ເຮົາ ຫຼື ຄົນທີ່ເຮົາສະໜິດຈະຢາກຟັງເລື່ອງທຸກ ຫຼື ປັນຫາທີ່ເກີດຂຶ້ນນຳເຮົາສະເໝີໄປ, ແຕ່ສະຫຼຸບລວມແລ້ວກໍຄື ການລົມກັນຄືທາງອອກທີ່ດີທີ່ສຸດ ແລະ ຕ່າງຝ່າຍຕ່າງບໍ່ໃຊ້ອາລົມພ້ອມພະຍາຍາມເຂົ້າໃຈກັນ ບາງຄົນອາດມີຄວາມສະດວກທາງດ້ານການເງິນຢູ່ແລ້ວ ແຕ່ບໍ່ໄດ້ໝາຍຄວາມວ່າຄົນອື່ນ, ຄົນສະໜິດ ຫຼື ໝູ່ເຮົາ ເຂົາເຈົ້າຈະພ້ອມເຊັ່ນດຽວກັນ. ດັ່ງນັ້ນ, ສະກິວການສັງເກດທຸກຄົນຄວນຈະຕ້ອງມີ ເພາະປັນຫານີ້ມັນຈະບອກກັນຕົງໆບໍ່ໄດ້ອີ່ຫຼີຖ້າບໍ່ຈຳເປັນ ຫຼື ຫຍຸ້ງຍາກສຸດໆ ຄວາມເຂົ້າໃຈສຳຄັນສຸດເດີ້ທຸກຄົນ.
ໂດຍ: ທີມບັນນາທິການ Muan
