ຮູ້ສຶກບໍ່ວ່າເຮົາເອງ ຫຼື ໝູ່ເຮົາ ມັກຈະມີຄົນລົມໃຫມ່ທີ່ມີນິໄສ, ຮູບຮ່າງ, ບຸກຂະລິກ ທີ່ຄ້າຍຄືກັບແຟນເກົ່າ, ຄົນລົມເກົ່າ ບາງເທື່ອກໍແມ່ນຄົນທີ່ເຄີຍແອບມັກມາດົນ ບໍ່ກະຮັກຄັ້ງທໍາອິດ.
ຜົນວິໄຈຈາກ ມະຫາວິທະຍາໄລໂຕຣອນໂຕ (University of Toronto) ໄດ້ບອກວ່າ ຄົນເຮົາມັກຈະເລືອກຄົບຕາມຄວາມມັກສະເພາະໂຕ ແລະ ມັກຈະຖືກດຶງດູດເຂົ້າຫາຄົນປະເພດດຽວກັນແບບຊໍ້າໆໃນເກືອບທຸກໂອກາດ.
ຈາກການເກັບຂໍ້ມູນຂອງງານວິໄຈ ທີ່ໄດ້ສອບຖາມກຸ່ມຄົນທີ່ມີປະສົບການຄວາມຮັກມາຫຼາຍກວ່າ 1 ຄັ້ງພົບວ່າ, 3 ເຫດຜົນທີ່ເຮັດໃຫ້ເຮົາຄົບກັບຄົນແບບເກົ່າໆມີຄື
1. ມີສະເປກຂອງຕົນຢູ່ແລ້ວ.
ຄົນສ່ວນຫຼາຍມີນິໄສທີ່ແຕກຕ່າງກັນ ສະນັ້ນ, ບໍ່ແມ່ນທຸກຄົນທີ່ຈະມີນິໄສທີ່ເຂົ້າກັບເຮົາ ແລ້ວເວລາທີ່ເຮົາເຈິກັບຄົນທີ່ໄປກັບເຮົາໄດ້ດີ ແລະ ເຮັດໃຫ້ເຮົາມີຄວາມສະບາຍໃຈເມື່ອຢູ່ນໍາ ເຮົາກໍຈະເອົາລັກສະນະຂອງຄົນນັ້ນມາເປັນມາດຖານໃນການເລືອກຄູ່ຮັກຂອງເຮົາ.
2. ສັງຄົມທີ່ເຮົາຢູ່ມີແຕ່ຄົນແບບເກົ່າ.
ແວດວົງສັງຄົມກໍເປັນອີກປັດໄຈໜຶ່ງທີ່ເຮັດໃຫ້ເຮົາບໍໄດ້ເຈິກັບຄົນ ແລະ ຄວາມສໍາພັນທີ່ແຕກຕ່າງໄປຈາກຄວາມຫຼັງຂອງເຮົາ, ແນ່ນອນວ່າຍ້ອນລັກສະນະນິໄສຂອງຄົນກຸ່ມດຽວກັນກໍຈະຄ້າຍກັນຢູ່ແລ້ວ ການເລືອກຄົບຂອງເຮົາກໍເລີຍບໍ່ມີການປ່ຽນແປງ.
3. ຄົນທີ່ເຂົ້າກັນມັກຈະຖືກດຶງດູດເຂົ້າຫາກັນສະເໝີ.
ຄົນທີ່ມີແວວຈະຄົບກັນມັກຈະມີແຮງດຶງດູດບາງຢ່າງຊ່ວຍໃຫ້ພວກເຂົາເຂົ້າໃກ້ກັນສະເໝີ, ແຕ່ຄົນທີ່ຈະຢູ່ນໍາກັນກໍບໍ່ຈໍາເປັນຕ້ອງຄືກັນໄປທຸກຢ່າງ, ມີຮ້ອນກໍຕ້ອງມີເຢັນ, ມີຄົນນໍາກໍຕ້ອງມີຄົນຕາມ, ບາດເຮົາໄດ້ຮູ້ແລ້ວວ່າຄົນແບບໃດຈຶ່ງຈະເຂົ້າກັບເຮົາໄດ້ ທຸກຢ່າງກໍຈະມາບັນຈົບກັນຢ່າງເປັນທໍາມະຊາດ.
ໃນຄວາມເປັນຈິງ, ການຄົບກັບຄົນແບບເກົ່າໆກໍອາດຈະເປັນໂຕເລືອກທີ່ເຮັດໃຫ້ເຮົານັ້ນສະບາຍໃຈກໍໄດ້, ເພາະຄົນເຮົາມັກຈະຢ້ານການປ່ຽນແປງ ກໍເລີຍເລືອກທີ່ຈະເດີນຕາມຄວາມສໍາພັນແບບເກົ່າໆເຊິ່ງອາດເປັນສາເຫດຂອງການຄົບໆເລີກໆແບບບໍ່ມີສິ້ນສຸດກໍໄດ້, ໃຜທີ່ຢາກລອງມີຄວາມຮັກແບບໃຫມ່ໆ ກໍລອງຊອກຫາຄົນທີ່ຢູ່ໄກສາຍຕາເບິ່ງເດີ.
ໂດຍ: ທີມບັນນາທິການ Muan
