ມ່ວນໄດ້ພາສາວງາມລູກຊອດລາວ-ອັງກິດ ເຈົ້າຂອງຜົນງານເພງດ່ຽວ ”CLWM – ຮັກໄດ້ບໍ່” ເຊິ່ງຢາກບອກວ່າສາວນ້ອຍຄົນນີ້ພະລັງສຽງການຮ້ອງບໍ່ທຳມະດາເລີຍ ແລະ ຫຼ້າສຸດວິດີໂອການຮ້ອງໂຄເວີເພງຫວຽດຂອງລາວກໍກາຍເປັນໄວຣັສໂດ່ງດັງຢູ່ທີ່ຫວຽດນາມ.
ມື້ນີ້ມ່ວນເລີຍພາມາລົມກັບລາວ ແລະ ບອກເລົ່າກ່ຽວກັບຜົນງານໃໝ່ໆເລື່ອງແຮງບັນດານໃຈຕ່າງໆ, ເພື່ອໃຫ້ໄດ້ມາທຳຄວາມຮູ້ຈັກກັນໃຫ້ຫຼາຍຂຶ້ນ ແລະ ທຸກຄົນຈະຕ້ອງຫຼົງຮັກກັນແນ່ນອນ.
ລາວແມ່ນນັກຮ້ອງສາວສຽງຫວານ ແລະ ພະລັງສຽງມີເອກະລັກ ເຈນນີ ເບວລາ ແກ້ວມໍລະກົດ (Jenny Bella Keowmorlakot ) ປັດຈຸບັນ ອາຍຸ 24 ປີ, ລາວແມ່ນນັກຮ້ອງສິລະປິນໃນສັງກັດ A-Modeling and Advertising.
ເຈນນີ ໄດ້ເລົ່າໃຫ້ມ່ວນຟັງວ່ານິໄສທີ່ຫຼາຍຄົນບໍ່ຄ່ອຍຮູ້ຄື: ໂຕແທ້ເຈນນີເປັນຄົນທີ່ເຂົ້າເຖິງງ່າຍຕະຫຼົກ, ອາລົມດີ ແລະ ຂິ້ອ້ອນ, ມັກເຮັດໃຫ້ຄົນອ້ອມຂ້າງມີຄວາມສຸກໄປນຳ ແລະ ເຈນນີເປັນຄົນທີ່ມັກການກິນເປັນທີ່ສຸດ, ຈະມີຄວາມສຸກກັບສິ່ງທີ່ມັກກິນຫຼາຍ. ສ່ວນກິດຈະກຳທີ່ມັກເຮັດໃນເວລາວ່າງແມ່ນ: ມັກຊ້ອມຮ້ອງເພງ, ເບິ່ງໜັງ, ອອກກຳລັງກາຍ ແລະ ໄປຄາເຟ່.
ເຈນນີ ມີຄວາມປະທັບໃຈທັງໝົດເລີຍໃນຜົນງານເພງ ”CLWM – ຮັກໄດ້ບໍ່“ ເພາະທັງດົນຕີຂອງເພງ ແລະ ເນື້ອຫາຂອງເພງ, ຫຼັກໆແມ່ນທີມງານຈາກ “Buffkhot Production ແລະ ທີມງານສັງກັດ A-Modeling and Advertising ຂອງເຈນນີ. ພວກເຂົາມີຄວາມອົດທົນຫຼາຍແຮງເພື່ອຢາກໃຫ້ເອັມວີອອກມາດີ ແລະ ທຸກລາຍລະອຽດຂອງເພງນີ້ອອກມາດີທີ່ສຸດ, ມີຄວາມຕັ້ງໃຈສະມັກຄີມັນເລີຍເຮັດໃຫ້ເຈນນີມີກຳລັງໃຈໃນການຖ່າຍທຳຜົນງານເພງໃນຄັ້ງນີ້.
ແຮງບັນດານໃຈໃນການສ້າງສັນຜົນງານເພງນີ້ແມ່ນມາຈາກເຈນນີເອງເລີຍ, ເປັນສ່ວນໜຶ່ງຈາກປະສົບການຊີວິດຄວາມຮັກທີ່ຍັງຢູ່ໃນຊ່ວງໄວໃສໃນຕອນນັ້ນ, ເລີຍໄດ້ປະຊຸມກັບທີມງານ ແລະ ຜູ້ກຳກັບ ເພື່ອຈະໄດ້ວາງແຜນເຮັດໂປຣເຈັກນີ້ ແລະ ໄດ້ Alex smoke ເປັນຜູ້ຂຽນບົດເພງນີ້ຂື້ນມາໃຫ້ຈຶ່ງເກີດເປັນເພງ “CLWM – ຮັກໄດ້ບໍ່”.
ສ່ວນການຮ້ອງເພງເເມ່ນເຈນນີໄດ້ຄ່ອຍໆພັດທະນາດ້ວຍຕົນເອງ, ໝັ້ນຝຶກຝົນຢູ່ສະເໝີ ແລະ ເຮັດໃຫ້ຮູ້ອີກວ່າການຈະເປັນສິລະປິນນັກຮ້ອງມັນບໍ່ແມ່ນເລື່ອງງ່າຍ ແລະ ແຕ່ມັນກໍບໍ່ມີເລື່ອງໃດທີ່ເຮັດບໍ່ໄດ້ ຖ້າເຮົາພະຍາຍາມໝັ່ນຝຶກຝົນຕົນເອງຢູ່ສະເໝີ.
ຖ້າຖາມເຈນນີວ່າໃນອານາຄົດຢາກຮ້ອງເພງແບບໃດ? ເຈນກໍຕອບບໍ່ໄດ້ຄືກັນເພາະຕອນນີ້ເຈນໄດ້ເຮັດເເນວເພງເປັນສະໄຕລ໌ Pop ທີ່ມີກິ່ນອາຍຂອງ R&B ຢູ່, ຕໍ່ໄປອາດຈະເຮັດເພງທີ່ມີກິ່ນອາຍຂອງຄວາມເປັນລາວ ເພາະຕອນນີ້ເຈນນີ ແລະ ທີມງານກຳລັງວາງແຜນເພງຕໍ່ໄປຢູ່.
ເປົ້າໝາຍໃນຊີວິດຂອງສິລະປິນທີ່ຕ້ອງເຮັດໃຫ້ໄດ້ຫຼັກໆແມ່ນ ເຈນນີ ຢາກສ້າງຊື່ສຽງໃຫ້ກັບປະເທດລາວ, ຢາກໄປເວທີຕ່າງປະເທດຈັກ 1 ຄັ້ງ ເພາະເປັນຄວາມຝັນຕັ້ງແຕ່ຕອນເຈນນີຍັງນ້ອຍໆ, ຖ້າຟັງເບິ່ງອາດຈະຮູ້ສຶກວ່າເປັນຄວາມຝັນທີ່ໄກໂພດ ແຕ່ເຈນນີເຊື່ອວ່າຖ້າມີໂອກາດນັ້ນມາຈະບໍ່ພາດແນ່ນອນລະຈະຕັ້ງໃຈເຮັດມັນໃຫ້ດີທີ່ສຸດ.
ເຈນນີຢາກຊຸກຍູ້ວົງການເພງລາວເຮົາໃຫ້ທົ່ວໂລກໄດ້ຟັງ, ໄດ້ເຫັນຄວາມສາມາດຂອງຄົນລາວທີ່ບໍ່ເເພ້ຊາດໃດ ແລະສົ່ງເສີມສິລະປິນລາວທຸກຄົນບໍ່ວ່າເປັນລຸ້ນໃໝ່ ຫຼື ລຸ້ນປັດຈຸບັນໃຫ້ສ້າງຜົນງານດີໆອອກມາໃຫ້ໄດ້ຫຼາຍທີ່ສຸດ.
ສຸດທ້າຍນີ້ຂໍຝາກຜົນງານເພງ “CLWM – ຮັກໄດ້ບໍ່” ຂອງເຈນນີ ຟັງໄດ້ທາງ YouTube ແລະ ຝາກຕິດຕາມຊ່ອງທາງ TikTok “Jenny bella“ ໃນໄວໆນີ້ ເຈນນີກໍຈະມີເພງໃໝ່ໃຫ້ທຸກຄົນໄດ້ຟັງເລື່ອຍໆເດີ ຝາກຕິດຕາມ ແລະ ເປັນກຳລັງໃຈໃຫ້ສິລະປິນໂຕນ້ອຍໆຢ່າງ ເຈນນີ ເບວລາ ກັນແດ່ເດີ
ໂດຍ: ທີມບັນນາທິການ Muan
