ການລາຈາກແບບໃດເຈັບປວດທີ່ສຸດ? ພໍເວົ້າເຖິງຄຳວ່າຈາກກັນບໍ່ວ່າຈະເປັນຮູບແບບໃດມັນກໍເສຍໃຈກັນທັງໝົດ ເພາະການທີ່ມີກັນຢູ່ດີໆ ແລ້ວມື້ໜຶ່ງເຂົາກໍຫາຍອອກໄປຈາກຊີວິດໄປ ຄວາມຮູ້ສຶກຂອງຄົນທີ່ຍັງຢູ່ບ່ອນເກົ່ານັ້ນມັນຈະເຈັບປວດຂະໜາດໃດບໍ່ມີໃຜຮູ້ໄດ້ແນ່ນອນ.
ລອງຟັງເພງ “ບົດສຸດທ້າຍ” ເພງໃໝ່ຈາກ Phoenix Boii x Thinlamphone ທີ່ຕ້ອງບອກວ່າເປັນການມາຮ່ວມຮ້ອງດ້ວຍກັນໄດ້ຢ່າງກົມກ່ອມ, ມີມິຕິດ້ວຍສຽງແຣັປທີ່ເທ້ລະມຸນ ແລະ ສຽງຫວານກັງວານຊວນຝັນ.
Phoenix Boii ແຣັປເປີຈາກຫຼວງພະບາງທີ່ມາພ້ອມກັບລັກສະນະການແຣັປທີ່ມີສະເໜ່ ແລະ ເທ້ຂອງລາວ, ໄດ້ມາຖ່າຍທອດຄວາມຮູ້ສຶກຜ່ານທ່ອນແຮັປທີ່ໄດ້ບອກເຖິງຄວາມຮູ້ສຶກທີ່ແສນເຈັບປວດຂອງຄົນທີ່ຍັງຢູ່.
ໄດ້ເລົ່າເຖິງຄວາມຮັກຄວາມສຳພັນຂອງຄູ່ຮັກຄູ່ໜຶ່ງທີ່ຖືວ່າທັງສອງນັ້ນຮັກກັນຫຼາຍ ເພາະໄດ້ຜ່ານຍັງນຳກັນມາ, ແຕ່ຢູ່ດີໆອີກຄົນກໍຫາຍຈາກກັນໄປ ເຮັດໃຫ້ຄົນທີ່ຍັງຢູ່ໄດ້ແຕ່ຄິດຮອດ ແລະ ນຶກເຖິງ
ໃນສ່ວນທ່ອນຮ້ອງຂອງ Thinlamphone ກໍມາທັງຕອນເລີ່ມເພງ ແລະ ປະສານສຽງກັນເປັນໄລຍະໃນເພງທີ່ເປັນຕົວແທນຂອງຄົນທີ່ເດີນຈາກໄປທີ່ໃຫ້ຄວາມຮູ້ສຶກເຖິງການຄະນຶງຫາ ແລະ ການທີ່ໄດ້ຫ່າງອອກໄປແບບນີ້ກໍເປັນສິ່ງທີ່ບໍ່ມີໃຜຫວັງໃຫ້ເປັນໄດ້ແຕ່ຫວັງວ່າອີກຄົນໜຶ່ງຈະຍັງຈື່ໄດ້ແຕ່ພາບສວຍງາມທີ່ທັງສອງມີໃຫ້ກັນດ້ວຍຄວາມຍິນດີ.
ໂດຍ: ທີມບັນນາທິການ Muan
